MOLAOKAKANYWA WA DITSELA TŠA GO LEFELELWA TŠA GAUTENG, 2003
Mamerantamo wa go ba mabapi le Molawana 136 wa melao yeo e sa fetolwego ya Lekgotlatheramelao la Profense ya Gauteng.
MABAKA A MOLAOKAKANYWA
Molaokakanywa wa ditsela tša go lefelelwa tša Gauteng (GTRB) o hlaloša dikgonegišo tša semolao tšeo di nyakegago tša go tsenywa ga tefišo ya bašomiši mo go ditsela tša go lefelelwa tša Profense. Go a tlhokega gore Gauteng e be le molaotlhakwa wa wona ya ditsela tša go lefelelwa woo go ya ka wona Molekgotla Phethiši a tla begago dikarolo tše itšego tša Mararankodi a Ditsela tša Profense gore ke tšona ditsela tša go lefelelwa. Tlhabollo ye e botlhokwa gore go kgone go šomišanwa le Mokgatlo wa Ditsela tša Bosetšhaba wa Afrika Borwa go tlhabolla go ya pele mararankodi a ditsela tšeo di lego ka go Profense. Molaokakanywa o dumelela gape Profense go tsenela kwano le SANRAL mabapi le tiragatšo ya mararankodi a tsela ya go lefelelwa. Molaokakanywa o netefatša gape gore therišano ya maswanedi e dirwa le bommasepala ba gae mabapi le go begwa ga ditsela tša go lefelelwa. Mararankodi a Ditsela tša Profense a tla tlhabollwa ka mokgwa woo e lego gore go tsenywa melaotlhakwa yeo ya ditsela tša go lefišwa gore di kgone go kgotsofatša ikonomi ya go gola ya Profense le ditlhoko tša thwalo tša batho ba yona.
THULANO GO TIKOLOGO
Molaokakanywa ga o na thulano go tikologo.
SEO MOLAOKAKANYWA O SE TLHALOŠAGO KA TŠA DITŠHELETE
Go lebeletšwe gore lekala la tša ditšhelete le tla šomišwa bjalo ka teseletšano ka go tiragatšo ya maanotshepetšo a ditsela tša go lefelelwa. Go ya pele, ditsela tša go lefelelwa ke mohuta wa tefišo ya bašomiši gomme ka moo ga go dithulano tša ditšhelete tše itšego tše hlokago go gatelelwa go ya ka Molaokakanywa wo.
DISWAYASWAYO TŠEO DI HUMANWEGO LE TŠEO DI KGOPETŠWEGO
Lebakeng la mengwaga ye meraro yeo e fetilego, go bile le ditherišano le bolaodi bja go fapana bja gae ka go Profense mabapi le GTBR le melaotshepetšo ya go lefiša ditsela kgolo tša profense e amogetšwe ke bolaodi bja maswanedi.
TLHALOŠO YA LEFOKWANA KA LEFOKWANA
Lefokwana 1: Lefokwana le le na le Ditlhalošo tša go ba maswanedi go Molao.
Lefokwana 2: Lefokwana le le bolela gore Molekgotla Phethiši a ka no bega tsela efe goba efe ye mpšha ya profense gore ke tsela ya go lefelelwa. Empa, lebakeng la tsela ya profense yeo e lego gona, Molekgotla Phethiši a ka no bega tsela ye bjalo ya go lefelelwa morago ga go rerišana le Letona la Profense.
Lefokwana 3: Lefokwana le le bolela ka moo tefišo le kgoboketšo ya tefišo di yo dirwago, go dumelela Molekgotla Phethiši go fa pušetšo goba tlogelo ya karolo goba ya botlalo mabapi le dikhatekori tša dinamelwa goba go dinamelwa tšeo di šomišwago ditseleng tša go lefelelwa ka nako ye itšego. Bokaalo bja tefišo bo tla phethwa ke Molekgotla Phethiši ka tigelo ya Kgoro morago ga therišano le bommasepala bao ka go mafelo a bona tsela ya go lefelelwa e lego.
Lefokwana 4: Lefokwana le le hlaloša ka moo batho bao ba dumeletšwego ba ka sepetšago ditsela tša go lefelelwa le go lefiša. Motho wa teseletšano o tla kgethwa go ya ka lefokwana le.
Lefokwana 5: Maatla a Molekgotla Phethiši mabapi le ditsela tša go lefelewa a hlalošwa ka gare ga lefokwana le. Molekgotla Phethiši o rwele maikarabelo a maanotshepetšo a peakanyo ka moka mabapi le tshepetšo ya ditsela tša go lefelelwa tša Profense mmogo le pego, tshepetšo, taolo, hlokomelo le tsošološo ya ditsela tša go lefelelwa.
Lefokwana 6: Therišano le bommasepala e swanetše go ba gona mabapi le pego ya ditsela tša go lefelelwa.
Lefokwana 7: Molekgotla Phethiši a ka no tsenela kwano le SANRAL mabapi le tiragatšo ya maanotshepetšo a tsela ya go lefelelwa go ba lwa karolelano ya maikarabelo gare ga bolaodi ka bobedi.
Lefokwana 8: Lefokwana le le dumelela Molekgotla Phethiši go diragatša maatla a itšego a kabelo go ya ka Molao wo.
Lefokwana 9: Molekgotla Phethiši o dumelelwa go tsenya ditshepetšo tša semolao go humana ditšhelete tša tefišo tšeo di šaletšego go ya la lefokwana le.
Lefokwana 10: Lefokwana le le kgaoletša ditokelo tša mekgatlo ye mengwe tša go tliša ditshepetšo tša semolao mabapi le ditsela tša go lefelelwa kgahlanong le Molekgotla Phethiši, mothwalwa wa Kgoro, motho ofe goba ofe yo a dirago legatong la Molekgotla Phethiši goba motho ofe goba ofe yo a sepetšago goba a agago tsela ya go lefelelwa.
Lefokwana 11: Lefokwana le le hlaloša mafelo ao ka go wona Molekgotla Phethiši a ka no dirago melawana.
Lefokwana 12: Molekgotla Phethiši a ka no dumelela bahlankedi ba profense ba go gatelela melao ya therafiki go phetha mediro ye itšego mo go ditsela tša go lefelelwa gape dikwano di ka no tsenelwa le mekgatlo ye mengwe ya kgatelelo ya melao go diragatša modiro wo.
Lefokwana 13: Se se dumelela go tšewa ga dinamelwa, tšeo di šomišeditšwego go tlola melao mo go tsela ya go lefelelwa.
Lefokwana 15: Lefokwana le le bolela gore ditlolomolao di ka no gapeletšwa batho bao ba tlolago Molao wo.
Lefokwana 16: Mmušo o tlangwa ke Molao.
Lefokwana 17: Lefokwana le le fa thaetlele ye kopana le go bolela gore Letona le ka no dira sephetho ka tšatši la go thoma go šoma ga karolwana ye ya molaotlhakwa.
